如果唔係亲眼见到

真係好难想象咁栩栩如生嘅点心真係可以食落肚

就喺天河购书中心5楼，新开嘅后街唐厨，係唐厨酒家集团旗下嘅餐厅，印象之中都几贵，去过之后，先发现人均60就可以埋单，环境靓，出品又好，超高性价比咯！

餐厅到处都充满中华特色。大厅中间矗立嘅大大支中华铅笔、毛笔，卡座上有东方古韵味道嘅油纸伞，冰糖葫芦、印象画……只要你用心睇，肯定可以发现惊喜。

除咗环境布置有味道，连用餐位都充满怀旧风。唔止旧汽车，连只在历史课本上出现嘅黄包车，喺呢度都可以亲身坐坐。

古色古香嘅包厢，坐喺里面，瞬间觉得自己化身文人雅士。

中华书局、文德路、诗书路、状元坊，估唔到食饭都可以咁文艺。嚟之前记得同手机充好电，各种拍照唔可以停！

参观完环境，肚仔都饿啦，快D拣个地方坐定定点嘢食啦。讲多句，后街唐厨呢度每张台都有电子触屏板，客人可以点击进入菜谱点菜，亦可以喺上面观看特色菜嘅制作视频。

【四福临门】

见到呢个菜，我只可以用丰盛嚟形容。由四个福字小瓦缸装住嘅酸菜、东坡肉、莲藕、猪肚，象征丰收，以前嗰个年代，可能得大富人家先有得食。

味道当然唔话得啦，各个小福缸都有自己嘅精致味道。令人惊讶嘅係，后街唐厨呢度几乎每个菜都有自己嘅专属盛器，唔同菜品配上唔同摆盘，的确好有心思。

【雀笼烧味拼盘】

“吱吱，吱吱”呢只雀笼绝对栩栩如生，两只金丝鸟停喺笼檐上，低头望住美食，真係好得人钟意。

烧味拼盘有两层，底层係烧肉、盐焗鸡、叉烧、鱼皮、烧鹅。

第二层係外酥内嫩嘅乳鸽。

【稻香猪手】

用秘制酱汁炆制而成嘅猪手，特别之处在于佢係同禾秆草一齐炆，有种怀旧嘅味道。而且猪手骨胶原好丰富，好啱女仔食。

猪手食起身胶感好重，黏黏嘅口感，酱汁好入味，丰软，细腻。

【十三幺】

自摸发财，食糊！一副十三幺上台，逼真到不得了。讲起呢个十三幺就巴闭啦，係后街唐厨嘅招牌出品，亦係后街唐厨嘅首创，因为太受欢迎，后嚟好多餐饮都纷纷效仿。但讲起味道，依然係呢度最正宗。

一只只麻将造型嘅係椰汁糕，香滑Q弹，咬开之后仲会见到里面粒粒软糯香甜嘅红豆，好睇得嚟又sweet。

【书中只有小黄鸭】

噔噔噔噔！唔小心，点咗本武功秘籍上台添，哎呀唔係，係饮食秘籍。打开之后，精致仿真嘅小黄鸭活灵活现噉出现喺面前。

小黄鸭前凸后翘，十足十真嘅一样。小黄鸭係用黄桃糕做嘅，食起身香甜软糯，十分可口。

【葫芦瓜】

“葫芦娃，葫芦娃，一根藤上七朵花……”七只葫芦瓜就冇啦，不过盆栽底部就多咗2只精灵得意嘅兔仔。

葫芦瓜係用南瓜糕炸成嘅，外皮酥脆，内里软糯，唔会太甜，食起身好香口感好正。

【姜太公钓鱼】

姜太公出没要注意啦！同历史有所唔同，今次姜太公钓咗好多鱼上嚟啵，收获颇丰富。

船上装载嘅，係炸鱼同炸菌菇，炸到金黄酥脆，食起身唔会觉得肥腻，口感都几轻盈。

【鸡生蛋 蛋生鸡】

一道分子料理。明黄嘅鸡仔配上生鸡蛋，令人不禁沉思究竟係鸡生蛋抑或蛋生鸡先。但其实鸡蛋唔係真正嘅生鸡蛋，当蛋黄喺舌尖上爆破嘅瞬间，会涌出一大波黄桃味果汁，实在令人惊喜。

鸡仔係瑶柱叉烧酥，造型好趣稚，馅料实在，瑶柱叉烧咸香得嚟又唔会肥腻，同酥皮嘅口感融合，食起身好match。

【扫一扫冻糕】

duang连冻糕都可以搞作，如果你要求婚或者表白，都可以亲自订做，然后印上去送畀女神，等佢扫一扫，出现月别不同嘅惊喜，实冧死女啦！

【龙井茶香骨】

用专人精心采摘嘅龙井茶叶嚟炮制，光係呢一份诚意，就足以美味致命。

茶香骨食入口，有一股好似栗子噉嘅特殊香气飘散开，正係呢道龙井茶香骨嘅特别之处。

【爆浆花枝球】

DO RE MI FA SO，每一个阶梯，都有一粒花枝招展嘅花枝球等住你。与别不同嘅係，花枝球係识爆浆噶！所以咬开嘅时候要特别小心，因住球里面嘅酱汁飞喷到周围都係啊

【榴莲焗元贝/青口】

新鲜元贝同青口，搭配香浓嘅榴莲肉酱，焗出嚟好香，食入口更加係满口榴莲嘅馥郁，而元贝同青口保留鲜嫩口感。

【杂菜盆栽沙拉】

唔讲嘅话，可能真係有人以为佢係一盆野菜！从盛器到摆盘，逼真到好似实物一样。野菜下面仲有培根，荤素搭配，营养好丰富。

食嘅时候，记得攞起水壶淋上沙律酱，搅拌过后先食，会特别好味。

【荷塘月色】

情不自禁谂起朱自清嘅《荷塘月色》，“曲曲折折的荷塘上面，弥望的是田田的叶子。叶子出水很高，像亭亭的舞女的裙”，散文中描述嘅，咪就係呢盅汤咯。

从壶中倒出汤水到杯中，汤水颜色青绿，清澈飘香，水壶里面仲有莲藕、排骨、绿豆等汤渣，饮完汤记得食喔。

【鲈鱼鸳鸯炒饭】

一条鲈鱼，两种做法，炸鱼粒同蒸鱼粒，加入炒饭里面。食一啖炒饭，有两种唔同嘅口感，有D意思。

【冰棍奶茶】

当冰棍遇上奶茶，唔止有得饮，更加有得食，噉样先至够招积！就算加咗冰棍，奶茶都唔会太甜，奶味香浓，茶味浓郁，正！

食饱饱，饮番啖茶清清肠胃，宜家先留意到，唔止菜单，连茶杯上面都印有后街唐厨嘅小插画，后街肥妹仔、唐三胖、街婶……令食客有丰富嘅互动体验。

后街唐厨

购书中心店地址：天河区天河路123号购书中心5楼(维多利广场旁边)

电话：020-37347100

海印又一城店地址：番禺区南村海印又一城4楼

电话：020-31129793

佛山岭南天地店地址：禅城区祖庙岭南天地文会里5号(近简照南佛堂)

电话：0757-82031572、0757-82031573

佛山乐从天佑城店地址：乐从镇乐从大道东B270号乐从天佑城2楼(近优衣库)

电话：0757-29398991

南海广场店地址：南海区南海大道北49号桂城南海广场8楼

电话：0757-86232180